Kosið var til stjórnlagaþings sl. laugardag. Í uppgjöri landskjörstjórnar kemur fram að kosningaþátttaka var rétt um 36% á landsvísu. Þetta er minnsta kosning hér á landi í meira en öld í samanburði við allar almennar kosningar hvort heldur er til Alþingis, sveitarstjórna, forsetakosninga eða kosninga um önnur mál. Í kosningu um Icesave samningana í mars sl. var kosningaþátttaka t.d. um 62%. Mest var kjörókn á laugardaginn í Reykjavíkurkjördæmi suður, eða 41,15%, tæp 40% í Reykjavíkurkjördæmi norður en á landsbyggðinni var hún töluvert minni. Í Norðvesturkjördæmi var kjörsókn 32,71%, Norðausturkjördæmi 30,46%, Suðvesturkjördæmi 37,08% en minnst í Suðurkjördæmi þar sem einungis 29,2% nýttu atkvæðisrétt sinn. Athygli vekur að ein kjördeild í Borgarfirði skar sig úr með betri kjörsókn en víðast annarsstaðar, eða um 54,6%. Það var Brúarásdeild í Hálsasveit. Ástæða þessarar góðu kjörsóknar er talin sú að bændum í Hvítársíðu og Hálsasveit var boðið að skila inn ull til móttökuaðila um leið og þeir kusu.