Berjaspretta sein af stað í ár

Nú þegar komið er fram yfir mitt sumar fari margir að velta fyrir sér hvernig berjasprettan sé. Sveinn Rúnar Hauksson læknir er mikill áhugamaður um berjatínslu og berjavinnslu. Hann segir horfur á berjasprettu tvísýna almennt á landinu. Verði sumarið hins vegar skaplegt það sem eftir lifir þess geti landsmenn þó farið að líta eftir berjum þegar líða fer á ágústmánuð og verði það okkur hliðhollt megi gera ráð fyrir að berin endist fram undir miðjan september.  Segir hann að miðað við undanfarin sumur megi segja að berjaspretta sé rúmum þremur vikum seinni á ferðinni nú í sumar.

Sveinn segir þó jákvætt að vegna þess hve sumarið hefur verið kalt hafi hann minna frétt af eyðileggingu lyngs vegna ágangs birkifeta en lirfur þess leiða kvikindis hafa undanfarin sumur víða lagt berjaland undir sig og skilið eftir brún og visin berjalyng.  Vestlendingar geta því huggað sig við að verði veðurguðirnir okkur hliðhollir það sem eftir lifi sumri geti þeir farið að líta til fjalla en vel lítur út með bláberjasprettu á Vesturlandi þó líkur séu á að eitthvað verði minna af krækiberjum en undanfarin ár.

skessuhorn.is